iSummit, ден 1

Игор: Конференцијата официјално започна денеска, утринската сесија ја започнаа претставниците на ајКомонс, Томи Медак и Хедер Форд.

Првата сесија ја водеше Џои Ито, со мај трејлер од Стар Врекс ин тхе пиркинкс, а потоа следеше презентација на мрежни сервиси кои нудат слободна музика Џамендо, магнатјуне и Лофтворк.

Во втората сесија конференцијата се подели на 4 ленти кои нависитна е тешко да се следат затоа што има навистина квалитетни предавања, но и работилници.

Успеав да го проследат предавањето на Кори Доктороу и последниот дел од предавањето за функциорање на онлајн заедниците кои се создаваат околу некоја, идеја, софтвер, проект, слободна култура или сл...

Новица: Остатокот од екипата беше на предавањето за заедниците. Од она што го чувме најголемиот број на заедници фунцкионираат како нашата и ги имаат истите проблеми. Не знам дали тоа е добро или лошо, но барем знаеме дека не сме сами. :) Она што можеше да се извлече како поука е дека за да биде успешна било која заедница треба: 1. да се направи основна критична маса (снежна топка која ќе почне да се тркала) и 2. влезот во заедницата да биде со што е можно помалку пречки - т.е. бариери за влез да нема. Ќе оставам другите да пресудат како ова изгледа кај нас.

По ова следеше „отворен пристап до јавни информации“ кое ми се виде интересно. Оттаму можам да кажам дека Македонија има еден од под подобрите закони за авторски права во светот. Австралија на пример е целосно заебана. Оваа сесија ја напуштив набргу по тој впечаток и се упатив на сесијата за отворено образование. Таму имаше одлични презентација/работилница за тоа какви проекти во образованието има низ различните земји во светов. Австралија пак беше лош пример. Таму училиштата трошат околу 60 мил. авст. долари за плаќање авторски права за учебници кои меѓу себе си ги продаваат. Лошо. Затоа полно луѓе во Австралија работат на правење слободни учебници.

Следеше пауза во која се дружевме со Мако Хил и Ес-Џеј од OLPC. Си игравме со едно OLPC и разговаравме за можноста да донесеме неколку во Македонија.

Потоа повторно на предавање за политички активизам на Интернет. Кори Доктороу дебатираше за тоа дека било какво користење на Интернет е активизам и дека доволно е само да инсталирате Firefox на пријателите за да го дадете својот придонес.

На крајот ги гледавме Лоренс Лесиг и Џонатан Зитрејн. Џонатан, покрај тоа што беше поучен, беше особено забавен и интересен. Раскажуваше за тоа како технологиите работат и кои се тие кои носат најмногу корист - се разбира тоа се отворените технологии. Нивната отвореност понекогаш прави проблеми (видите SMTP и SPAM), но тоа не значи дека треба да ги напуштиме и заборавиме.

Лоренс Лесиг го гледавме за прв и последен пат. Одржа презентација слична по форма на онаа за слободна култура што ја гледавме во Скопје, но на малку поинаква тема: поентата беше дека движењето останува на „нас“. Лоренс Лесиг го најави своето повлекување оставајќи полно луѓе во мал шок.

Вечерта повторно дружење, посета на изложба на уметниците од самитот и малку слободна музика.

Денес почнува нов ден се надевам исто толку интересен.

П.С. Очекувајте интересно „Сподели“ овој вторник. Веројатно ќе има повеќе информации за ова во следните 24 часа.